ભારત અને બાંગ્લાદેશ વચ્ચે બે ટેસ્ટ મેચની સિરીઝની પ્રથમ મેચ ચેન્નાઈના ચેપોક મેદાન પર રમાઈ હતી. આ મેચમાં ભારતે બાંગ્લાદેશને 280 રનના વિશાળ માર્જિનથી હરાવ્યું હતું અને સિરીઝમાં 1-0ની લીડ મેળવી હતી. આર અશ્વિન, જસપ્રિત બુમરાહ, શુભમન ગિલ, રવિન્દ્ર જાડેજા, રિષભ પંત જેવા ખેલાડીઓએ મેચમાં ભારત માટે શાનદાર પ્રદર્શન કર્યું હતું. હવે ટીમ આગામી મેચ 27 સપ્ટેમ્બરથી કાનપુરના ગ્રીન પાર્ક સ્ટેડિયમમાં રમશે.
વર્લ્ડ ટેસ્ટ ચેમ્પિયનશિપના દૃષ્ટિકોણથી પણ આ મેચ ટીમ ઈન્ડિયા માટે ખૂબ જ મહત્વપૂર્ણ રહેશે. આ મેચમાં ટીમ ઈન્ડિયાના સ્ટાર ઓલરાઉન્ડર રવિન્દ્ર જાડેજા પાસે ઈતિહાસ રચવાની તક હશે.
કઈ સિદ્ધિ હાંસલ કરશે જાડેજા?
ટેસ્ટ ક્રિકેટમાં રવિન્દ્ર જાડેજાના નામે હાલમાં 299 વિકેટ અને 3122 રન છે. કાનપુરના ગ્રીન પાર્ક સ્ટેડિયમમાં યોજાનારી બીજી ટેસ્ટ મેચમાં રવિન્દ્ર જાડેજા 1 વિકેટ લેતાં જ તે ટેસ્ટ ક્રિકેટમાં 300 વિકેટ અને 3000 રન બનાવનાર ખેલાડીઓની ચુનંદા ક્લબમાં જોડાઈ જશે. ક્રિકેટની દુનિયામાં અત્યાર સુધી માત્ર 10 ક્રિકેટર જ આ સિદ્ધિ મેળવી શક્યા છે. આવી સ્થિતિમાં રવિન્દ્ર જાડેજા આ સિદ્ધિ મેળવનાર 11મો ક્રિકેટર હશે.
ત્રીજો ભારતીય બનશે રવિન્દ્ર જાડેજા
ક્રિકેટમાં 300 વિકેટ અને 3000 રન બનાવવાની સિદ્ધિ મેળવનાર રવિન્દ્ર જાડેજા ત્રીજો ભારતીય ખેલાડી બનશે. તેમના પહેલા આર અશ્વિન અને કપિલ દેવે આ સિદ્ધિ મેળવી હતી. આર અશ્વિને તેની ટેસ્ટ કરિયરમાં અત્યાર સુધીમાં 522 વિકેટ લીધી છે અને 3422 રન બનાવ્યા છે. જ્યારે કપિલ દેવે પોતાની ટેસ્ટ કરિયરમાં 434 વિકેટ અને 5248 રન બનાવવાની સિદ્ધિ મેળવી છે.
પ્રથમ મેચમાં ટીમ ઈન્ડિયાની જીતમાં મહત્વની ભૂમિકા ભજવી
ભારત અને બાંગ્લાદેશ વચ્ચે રમાયેલી પ્રથમ ટેસ્ટ મેચમાં ટીમ ઈન્ડિયાની જીતમાં રવિન્દ્ર જાડેજાએ મહત્વની ભૂમિકા ભજવી હતી. ટીમ ઈન્ડિયાએ પ્રથમ દાવમાં માત્ર 144 રનના સ્કોર પર પોતાની 6 વિકેટ ગુમાવી દીધી હતી. આ પછી મેદાન પર આવેલા રવિન્દ્ર જાડેજાએ આર અશ્વિન સાથે શાનદાર ભાગીદારી કરીને ટીમના સ્કોરને 376 રન સુધી પહોંચાડવામાં મહત્વની ભૂમિકા ભજવી હતી. જાડેજાએ પ્રથમ દાવમાં 86 રન બનાવ્યા હતા, જ્યારે બીજી ઇનિંગમાં તેને બેટિંગ કરવાની તક મળી ન હતી. રવીન્દ્ર જાડેજાએ બેટિંગ ઉપરાંત બોલિંગમાં પણ સારું પ્રદર્શન કર્યું હતું. રવિન્દ્ર જાડેજાએ પ્રથમ દાવમાં 2 અને બીજી ઈનિંગમાં 3 વિકેટ ઝડપી હતી.