- ટેસ્ટ અને હેલ્થ બંને સચવાશે
- બેસન ગટ્ટાનું શાક પરિવારને ભાવશે
- રોટલી અને ભાત સાથે આ શાક આપશે ખાસ ટેસ્ટ
રાજસ્થાની ગટ્ટાની સબ્જી તો કદાચ તમે ખાધી જ હશે. જો ના ચાખી હોય તો તેના વિશે સાંભળ્યું તો જરૂરથી હશે. આમ તો એ રાજસ્થાની ગટ્ટા અને આપણા ગુજરાતી મૂઠિયામાં વધારે અંતર નથી. તેને બનાવવામાં થોડો ફરક છે. ઘરમાં કોઈ શાક ન હોય તો હવે આજે ઘરે જ બનાવી લો બેસન ગટ્ટાનું શાક.
જાણો કેવી રીતે બનશે ગટ્ટા
બસ ફરક માત્ર એટલો જ છે કે, આપણે મૂઠિયાને થાળીમાં મૂકીને બાફી છીએ અને રાજસ્થાની ગટ્ટા બેસનમાંથી બને છે અને તેને સીધા જ ગરમ પાણીમાં નાખીને જ બાફવામાં આવે છે. બાફ્યા બાદ જે પાણી વધે છે તેનો ઉપયોગ શાકમાં જ ગ્રેવી બનાવવા માટે કરાય છે.તો જાણો કેવી રીતે બનાવશો આ ટેસ્ટી શાક.
બેસન ગટ્ટા
સામગ્રી
-દોઢસો ગ્રામ ચણાનો લોટ
-બે ચમચી લાલ મરચું
-બે ચમચી ધાણાજીરું
-અડધી ચમચી હળદર
-ચાર મોટા ચમચા તેલ
-દોઢસો ગ્રામ દહીં
-ચપટી હિંગ
-અડધી ચમચી જીરૂં
-એક ચમચી ગરમ મસાલો
-એક ચમચી આંબોળીયાનો પાવડર
-મીઠું સ્વાદ અનુસાર
બનાવવાની રીત
સૌપ્રથમ ચણાના લોટમાં જરૂર પ્રમાણે મીઠું, મરચું, હળદર અને તેલનું મોણ દઈ લોટ બાંધવો. તેમાંથી લાંબા વાટા બનાવી આ વાટાને ગરમ પાણીમાં બાફી લેવા. તે તરત જ બફાઈ જશે. હવે એક વાસણમાં તેલ ગરમ મૂકી, તેમાં હિંગ-જીરાનો વઘાર કરવો. તેમાં બાફેલા વાટાના નાના-નાના ટુકડા કરીને નાખવાં. ધાણાજીરૂં, ગરમ મસાલો, કોથમીર અને આંબોળીયાનો ભૂકો ઉમેરી લેવો. તેમાં મસાલાવાળું દહીં ઉમેરવું. એક ઉભરો લેવો. શાક તૈયાર થઈ જશે. આ શાકને તમે પરોઠા સાથે કે ભાત સાથે પણ પીરસી શકો છો. આ શાક ઝડપથી તૈયાર થઈ જાય છે અને ટેસ્ટ અને હેલ્થ માટે સારું રહે છે.