ભારતીય બેટ્સમેન સરફરાઝ ખાને ઈતિહાસ રચ્યો છે. મુંબઈ તરફથી રમતી વખતે, તેણે શાનદાર બેવડી સદી ફટકારી અને રેસ્ટ ઓફ ઈન્ડિયા સામે સ્કોરિંગની શરૂઆત કરી. તે ઈરાની ટ્રોફીમાં મુંબઈ માટે બેવડી સદી ફટકારનાર પ્રથમ બેટ્સમેન બની ગયો છે. સરફરાઝ ખાનને બાંગ્લાદેશ સામે તાજેતરમાં રમાયેલી ટેસ્ટ શ્રેણીમાં ભારતીય ટીમમાં તક મળી હતી. પરંતુ તેને અંતિમ ઇલેવનમાં સ્થાન આપવામાં આવ્યું ન હતું.
જોકે હવે તેણે ઈરાની કપમાં ધૂમ મચાવી દીધી છે.
સરફરાઝ ખાને ફટકારી બેવડી સદી
સરફરાઝ ખાન ઇનિંગની શરૂઆતથી જ લયમાં જોવા મળ્યો હતો અને કોઈ વધુ જોખમ લીધા વિના તેણે માત્ર 150 બોલમાં પોતાની સદી પૂરી કરી હતી. તેણે કેપ્ટન અજિંક્ય રહાણે સાથે શાનદાર ભાગીદારી કરી, જેના કારણે તે મુંબઈની ટીમને મુશ્કેલ પરિસ્થિતિમાંથી બહાર કાઢવામાં સફળ રહ્યો. તેણે માત્ર 253 બોલમાં 200 રન પૂરા કર્યા અને આ દરમિયાન તેણે 23 ફોર અને ત્રણ સિક્સર ફટકારી હતી. તેના કારણે જ મુંબઈની ટીમ મોટા સ્કોર સુધી પહોંચવામાં સફળ રહી છે. સમાચાર લખાય છે ત્યાં સુધી મુંબઈએ 8 વિકેટ ગુમાવીને 483 રન બનાવ્યા હતા.
ઈંગ્લેન્ડ સામે ટેસ્ટ ડેબ્યુ કર્યું
સરફરાઝે વર્ષ 2024માં ઈંગ્લેન્ડ સામે ભારતીય ટીમ માટે ટેસ્ટ ડેબ્યૂ કર્યું હતું. આ પછી તેણે કુલ 3 ટેસ્ટ મેચમાં 200 રન બનાવ્યા છે જેમાં ફિફ્ટી સામેલ છે. તેની સરેરાશ 50.00 હતી. એકવાર તે ક્રિઝ પર આવી જાય પછી તેને આઉટ કરવો મુશ્કેલ બની જાય છે અને છેલ્લી કેટલીક સિરીઝમાં તેણે ડોમેસ્ટિક ક્રિકેટમાં રનના ઢગલા કર્યા છે. આ સિવાય તેણે 50 ફર્સ્ટ ક્લાસ મેચોમાં 4183 રન અને 37 લિસ્ટ-એ મેચમાં 629 રન બનાવ્યા છે.
શું તેને ન્યૂઝીલેન્ડ સામેની સિરીઝમાં પ્લેઈંગ-11માં તક મળશે?
બાંગ્લાદેશ સામેની ટેસ્ટ શ્રેણીની પ્લેઈંગ ઈલેવનમાં સરફરાઝ ખાનની જગ્યાએ કેએલ રાહુલને તક મળી, ત્યારબાદ રાહુલે ત્રણ ઈનિંગ્સમાં માત્ર એક ફિફ્ટી ફટકારી હતી. સરફરાઝ ખાન અને ધ્રુવ જુરેલને ટીમ ઈન્ડિયાની પ્લેઈંગ ઈલેવનમાંથી બહાર રાખીને રાહુલને તક મળી હતી. બાંગ્લાદેશ બાદ હવે ટીમ ઈન્ડિયાને ન્યુઝીલેન્ડ સામે ટેસ્ટ સીરીઝ રમવાની છે, જેમાં ત્રણ મેચ રમાશે. આવી સ્થિતિમાં એ જોવાનું રહ્યું કે શું ટીમ ઈન્ડિયાની પ્લેઈંગ ઈલેવનમાં રાહુલની જગ્યાએ સરફરાઝનો સમાવેશ થાય છે કે પછી તેને ફરી એકવાર બહાર બેસવું પડશે. રાહુલે ભારતીય ટીમ માટે અત્યાર સુધી 52 ટેસ્ટ મેચમાં 2969 રન બનાવ્યા છે. આ સમયગાળા દરમિયાન તેની એવરેજ માત્ર 34.52 રહી છે.