રોહિત શર્માની આગેવાનીમાં ભારતીય ક્રિકેટ ટીમે 17 વર્ષે ટી20 વર્લ્ડ કપ જીતીને 140 કરોડ ભારતીયોના દિલ જીતી લીધા હતા. શનિવારે મધરાતથી દેશભરમાં ભારતના આ વિજયની દિવાળી જેવી ઉજવણી કરવામાં આવી હતી. નાના બાળકોથી લઈને મોટા તમામ લોકો રસ્તા પર તિરંગો લઈને ખુશખુશાલ ઝૂમતા નજરે પડ્યા હતા. ક્યાંક ફટાકડા ફોડીને ભારતની આ જીતની ઉજવણી કરવામાં આવી હતી.
દિલ્હીમાં ઈન્ડિયા ગેટ નજીકના માર્ગ પર હજારોની સંખ્યામાં સમર્થકો ઉમટી પડતા રોડ પર ચક્કાજામના દ્રશ્યો જોવા મળ્યા હતા. વેસ્ટ ઈન્ડિઝમાં રમાયેલી આઈસીસી ટી20 વર્લ્ડ કપની ફાઈનલમાં ભારતીય ટીમે દક્ષિણ આફ્રિકાના મુખમાંથી જીતનો કોળિયો છીનવી લીધો હતો. આ જીત બાદ ભારતીય ટીમના કોચ રાહુલ દ્રવિડ સહિત ટીમ ખેલાડીઓએ જીતનો જશ્ન મનાવ્યો હતો. ભારતના સુકાની રોહિત, ઉપસુકાની હાર્દિક સાથે બીસીસીઆઈ સેક્રેટરી જય શાહે વેસ્ટ ઈન્ડિઝના બ્રિજટાઉન ખાતે રાષ્ટ્રધ્વજ લહેરાવ્યો હતો.
