સૂર્યકુમારે T20 વર્લ્ડ કપ 2024ની ફાઇનલમાં ઐતિહાસિક કેચ પકડ્યો હતો. આ કેચ સદીઓ સુધી ક્રિકેટ ફેન્સને યાદ રહેશે. જોકે, જ્યારે ડેવિડ મિલરે આ શોટ રમ્યો ત્યારે રોહિત શર્માએ જીતની આશા ગુમાવી દીધી હતી. જેનો એક વીડિયો વાયરલ થઈ રહ્યો છે જેમાં તેની પ્રતિક્રિયા જોઈ શકાય છે.
બાર્બાડોસમાં ભારતીય ટીમની સાથે સાથે ક્રિકેટ ચાહકોના શ્વાસ અધ્ધર થઈ ગયા હતા.
તે મેચની છેલ્લી ઓવર હતી અને દક્ષિણ આફ્રિકાને જીતવા માટે 16 રનની જરૂર હતી. સેટ બેટ્સમેન ડેવિડ મિલર ક્રીઝ પર હતો. કેપ્ટન રોહિત શર્માએ બોલ હાર્દિક પંડ્યાને આપ્યો હતો. ડેવિડ મિલરે પ્રથમ બોલ પર લોંગ ઓફ તરફ શોટ રમ્યો હતો.
એક ક્ષણ માટે બધાને લાગ્યું કે આ બોલ સિક્સર માટે જઈ રહ્યો છે. કેપ્ટન રોહિત શર્માએ પણ આશા ગુમાવી દીધી હતી, પરંતુ લોંગ ઓફ બાઉન્ડ્રી પર ઉભેલા સૂર્યકુમાર યાદવે તેની ડાબી બાજુ જઈને કેચ પકડ્યો હતો. જો કે તેનું સંતુલન બરાબર ન હતું. તે બાઉન્ડ્રી તરફ જઈ રહ્યો હતો. અહીં સૂર્યાએ બોલને હવામાં ઉછાળ્યો અને પોતે બાઉન્ડ્રી પાર કરી ગયો અને પછી મેદાનની અંદર આવીને કેચ પકડ્યો હતો.
